回复：【喜喜】【返港】20180817郑嘉颖夫妇婚后返港 新闻+图片+视频

【唔會擺酒】想生豬年BB 鄭嘉穎：聽講豬仔有福氣
20180817(00:51) 來源：MING報
鄭嘉穎與陳凱琳今晚自峇里返港，影相時陳凱琳聽到大家叫她「鄭太」，笑言：「唔慣呀！」嘉穎在旁笑笑口說：「慢慢會慣。」他們婚後在峇里慶祝完嘉穎生日才返港，問陳凱琳送什麼驚喜給嘉穎？嘉穎說：「唔使，佢最好嘅已經送咗畀我！」
盛傳陳凱琳懷孕，是否雙喜臨門？嘉穎說：「有消息會講畀大家聽，但依家未有消息。（這幾日努力中？）大把時間啦！慢慢來。（是否想追豬年BB？）豬年都仲有排，都好嘅，聽講豬仔有福氣。」鄭媽媽有無畀壓力？陳凱琳說沒有，一步步來，順其自然。
回港會否補擺喜酒？嘉穎說不會，他們是想要一個簡單的婚禮，雙方家長都同意。稍後會度蜜月，地點不會透露。陳凱琳表示回港會跟「少婦聯盟」食飯再慶祝。

老公在此!鄭嘉穎Man爆攬老婆，陳凱琳樂於小鳥依人。(孫華中攝)

完全投入二人世界。(孫華中攝)

曬婚戒兼示範十指緊扣。(孫華中攝)

拖到實一實。(孫華中攝)

燦爛笑容好SWEET!(孫華中攝)

一對新人峇里返港被記者重重包圍訪問。(孫華中攝)

（◕(ｪ)◕）（◕(ｪ)◕）（◕(ｪ)◕）（◕(ｪ)◕）（◕(ｪ)◕）

喺峇里呢幾日，陳凱琳話喺周圍食下嘢，過得好開心，嘉穎補充係慶祝生日，唔使surprise，最好禮物都已經送咗，相信係指娶到陳凱琳就係最好嘅禮物。咁係咪雙喜臨門？佢答：「有消息先同你講，都未有消息，慢慢都唔遲。」會唔會想追豬生BB？佢諗咗陣就答：「豬年都有排啦，都好嘅，豬仔仔福氣。」
陳凱琳話奶奶冇俾壓力，順其自然就OK。之前陳凱琳爸爸媽媽都俾滿分女婿，佢話雙方父母今次婚禮都好開心。被問到喺禮婚上邊個眼淺啲？陳凱琳以冧樣望住嘉穎話：「差唔多啊」嘉穎就答：「都唔係話眼唔眼淺，感動就會。」

【怪兄弟唔幫手】鄭嘉穎講《一千個願意》故事 陳凱琳冧爆：好叻呀你！
建立時間 (HKT): 0817 00:19 來源：水果RI報
雖然已經夜深，但經過一日勞累，所以鄭嘉穎同陳凱琳今晚返港時，都戴上墨鏡，陳凱琳就著住鬆身衫加短褲，甜蜜接受傳媒訪問，受訪時不時十指緊扣，或者扣住老公強勁臂彎，sweet到漏。
問到接新娘時，嘉穎唱《一千個願意》呢首歌有冇乜嘢特別意義？嘉穎話：「即係咁嘅，我呢，我就會喺屋企練下歌嘅，呢隻都係練歌嘅其中一隻嚟嘅，因為係小弟剛剛出道嘅時候嘅歌。佢聽過，話好鍾意呢隻歌，我話：『你好鍾意呢隻歌？』佢話：『歌詞係咪講我0架？』咁好明顯係講你啦！」講嗰陣嘉穎把聲真係冧到呢……加上電眼，令鄭太都忍唔住大笑。
嘉穎續道：「佢話好鍾意聽，好想聽我唱呢隻歌俾佢，咁我就……佢話：『你要唱歌，我要聽嗰隻。』咁我已經知佢想聽邊隻。係啦！接新娘嗰陣就唱咗呢隻先至娶到老婆啦！」

至於接新娘過程呢，結婚當日嘉穎已經多謝咗一班姊妹手下留情，至於詳情，佢就話：「哦，嗰啲姊妹同伴娘都好幫手，因為我真係冇乜人幫手。」
「我嗰啲（兄弟）就掛住拍片嘅，亦都唔多出聲，靠我一個人去……好似搞掂晒咁，所以佢哋都冇乜點難為我。」一直情深望住老公嘅鄭太忍唔住讚：「好叻呀你！」
嘉穎表示不會補擺酒，謂一個簡單婚禮係佢哋一直夢寐以求：「得到雙方家長嘅同意，我覺得幾圓滿，係一個我哋夢想中嘅婚禮。」唔擺酒，但嘉穎話會度多次蜜月喎：「會呀！」去邊？佢就笑笑口話：「梗係唔話你知啦！」
龔嘉欣因為身體不適嚟唔到，陳凱琳話已經問候咗佢……係關心嗰隻問候，話遲啲再約食飯。訪問長約四分鐘，嘉穎好有禮貌咁話多謝大家：「打搞咗你哋，真係唔好意思。」之後應傳媒要求展示婚戒拍照，兩人沿途行去停車場仍然受到大批傳媒追訪，嘉穎都攬實太太，之後登上七人車離開。