歌手胡鴻鈞（Hubert）憑無綫劇《降魔的》「石敢當」一角而人氣急升，正所謂人紅自然是非多，近年變得愈嚟愈有韓星味道嘅佢，不時被傳「削骨還父」，更被指由方形面進化至V煞面。不過，前年胡鴻鈞接受東網專訪時，就誓神劈願咁提出力證否認整容。
呢日，胡鴻鈞喺社交網忽然晒出一張讀小六時影嘅學生相（所謂嘅有圖有真相？），並留言：「先生，你是誰呀？」相中胡鴻鈞雖然戴上眼鏡，不過仍睇得出仲有少少面尖尖，一啲都唔似方包面……有網友就留言話細個嘅胡鴻鈞同依家唔多似樣，仲話佢依家識得打扮靚仔咗好多，簡直仔大18變呀！不過，亦有網友力撐佢冇整容，仲指一睇就知個腮骨係純天然添！