篇文笑死我，识睇粤语嘅吧友入嚟啦。唔系咸湿嘢，吧务唔好手滑啊！
请将胸部收细
- 汤米 @ 08-02-2014 / 今日
注：真人真事，如有雷同，家门不幸。
Facebook friend list 之中有个旧同事，佢住喺我隔离楝大厦。同佢好少见面，但我都几了解佢生活，因为佢平均每日会 post 十几廿条 status 上 facebook，当中超过一半系有胸。
我都知正常人都有胸，著泳衣、cosplay、著晚装……等等好多情况都会露胸，但佢劲在著咩衫对波都会走出嚟同你 say hi，即系著街坊装落街食碗鱼蛋粉都要自拍都算，点可能可以一手拎机另一只手拎住枝胶匙举只V手出嚟用阴力喞到只波上颈（冇错系只唔系对）？
有时用手势或者道具夹唔起对波，佢就会用姿势搭够。嗰啲临瞓福利图，唔知点解临瞓都化行哂妆假眼睫毛，加埋著住 lace 睡衣嘅佢一打侧训就自然会「北漏动奶」，当然做戏做全套，要加多句：「各位早抖，我一个人刀可以训得好。」
屌你训啦柒头！用遥控影成百九几张相，拣完重要执相，之后又要落妆同换返衫先有得训，唔好唔记得第二朝又要早成个钟起身，做返场招魂法事叫返啲五官归位，先可以影返张：「morning 啊各位，一起身唔愿落床牙。」
虽然我心底系咁笑佢，但其实我成日 like 佢啲相同留言鼓励佢：「哗件衫好靓啊！」 「你个妆好 pro 啊！」 「你好似又瘦咗啊~」 之类，佢又会好有耐性覆我嘅留言。佢人品唔差，亦唔系嗰种拜金港女格，可能只系想有多啲人关注佢。睇佢 facebook 个 friend list，真系乖乖不得了，有成二千几个 follower，分分钟多过啲奀星！
有晚佢 whatsapp 我，问我可唔可以落楼下茶餐厅同佢吹下水。落到去见到佢坐埋喺角落神情呆滞，佢话俾条仔飞咗。我心谂：屌俾仔飞咋嘛！你一年都转几个男朋友架啦。但我都有做吓样安慰吓佢，顺便等佢讲啲唔开心嘢出嚟等我开心吓。
佢话同个男仔识咗成年先一齐，就系半个月前佢同个ex分手先乘虚而入，点知一齐冇耐就话分手。我问多两问，原来所谓相识咗一年系指 facebook 上 follow 咗佢一年，之后见佢同男友分手就 pm 佢话暗恋佢好耐，第二日约出嚟见面就一齐。
我好理性咁同佢讲，唔啱都冇办法啦，你又靓女又多人追，咪再搵过个罗。点知佢即刻喊到猪西咁样，佢话呢段感情好 hurt，好想死！我问佢系咪借咗钱定拍咗你片啊？半个月可以有几咁荡气回虫呢？点知佢话，佢接受唔到个男仔分手嘅理由：
「你真人个胸比起网上睇细好多。系细好多，唔系少少。」
我即场启动震机模式忍笑，你老味嗰条友仔都几仆街，作个藉口都懒，可以想像嗰份图片与实物不符嘅哀怨有几深。佢问我，点解啲男人咁仆街，个个都系贪佢身材同上床，次次拍拖都拍唔耐，点样先可以揾到一个好男人。
我都唔知讲乜好，本来想讲啲大道理又觉得㗰气，唯有叫佢自己睇返 facebook 嘅相，大部份都系影住个胸，其余都系食嘢、k-pop，咁你觉得个男仔了解你啲咩优点呢？赞你识食呀？赞你听畸 pop 有品味呀？不如你试吓讲吓其他嘢，等人哋了解你身材以外嘅嘢啦。
佢听完我闹佢几句，觉得我闹得佢好啱。点知当晚半夜我打开电脑，又见到佢著件小背心夹胸！但加多咗一句：「内在美比外在美重要，希望会遇到一位懂得欣赏我内在美的人。」
……咁即系点啊？你估啲人有X光眼呀？望住你个胸可以睇穿你嘅内在美？
老老实实佢只系自贬身价，任何人都有一个价，唔系价钱，而系价值。明明塑造到自己系性感女神，食只烧鹅脾都要搔首弄姿，搞到留言一地精，男人剩系想同你上床好正常吧？点知见到实物先知系 PS 大师，身材同个样唔系嗰回事都算啦，但已经俾人感觉你个人唔老实。再发展落去上埋床，你根本唔系佢幻想中嘅风情万种小野猫，只系一个好普通嘅女仔，连唯一可取嘅地方都冇埋，咁对方贪你乜？贪你 PS 得叻跟你学嘢？
我即刻 whatsapp 佢话，喂你咁样真系唔掂喎，头先先话想搵个好男人认认真真咁拍拖。不如你开个新 account，唔好再贴埋啲对波图，认认真真做返自己啦。
点知佢第二朝覆返我： 「开个新 account 就好难再咁多人 follow 架啦！」
（完）