【WM。威心唯幂】120524 40后刘丹&70后恺威

一九六八年，国泰电影演员训练班招募，三千多人投考，最后取录了四十八人，班主任更为其中一位名叫刘庆基的学员改了艺名，叫刘丹，取材自文天祥的七言律诗《过零丁洋》最尾一句：「留取丹心照汗青」。话说此诗是文天祥在抵抗元朝军队失败成俘虏后，於广东零丁洋元朝军舰上所写的，既藉以表明自己忠於宋朝的心志，亦慨叹自己一生致力起兵抗元，却换来孤苦无援的命运。 相对起来，自称是「四十后」的丹爷刘丹，其演艺之路则刚好相反：从影四十四年，他在国泰、邵氏拍过国语片，七十年代当过月入逾万元的配音员，然后七六年跳进公仔箱，拍完佳视到无线，又加盟过亚视，虽然称不上大红大紫，但大家却不会忘记他由八○年keep到现在的招牌胡须，以及曾是「洪七公」（射雕/神雕系列）、「冯敬尧」（《上海滩》）、「叉烧炳」（《真情》）、「泉叔江兆泉」（《天与地》），还有半裸上身大晒九纹龙的「冯志明」（《4 in Love》）。「咁多年嚟，我喺工作上最好彩系，一直都系人哋嚟搵我，而唔系我去搵人。我呢生人啲际遇都好奇怪，成日谂到嗰啲嘢，就会无啦啦有，但我想中马标、中六 彩呢，又未中过喎！哈哈哈！」六十七岁的丹爷的成长点滴，大概也是很多香港人的故事。


在芸芸经典角色中，丹爷最爱《上海滩》的「冯敬尧」。「佢嘅内心戏比较多。」
在神剧《天与地》中的「泉叔」（左二），协助徒弟「鼓佬」林保怡（左三）参选入立法会，丹爷说戚其义写有关剧情时，亦有问过他从前参选的情况。
《4 in Love》中的「冯志明」，半裸大晒九纹龙，壮健身形，全赖他热爱户外运动所致，「网球、高尔夫、踢波、游水，我连潜水教练牌都考埋，最深潜过八十几九十呎！」

世界之大 我初初读完书出嚟就做建筑，后尾建筑冇得捞，我就谂：不如去环游世界，散吓心呀，但我冇钱o架嘛，咁点呀？哼，后尾有个uncle走嚟问我，有冇兴趣跟佢行船，我谂谂吓：有人工逗，又可以环游世界，几好喎，咁我咪去罗！上船第一日，我从未试过离开过香港，一出去，见到茫茫大海，呢个南中国海喺地图上咁细，但都已经一望无际，睇唔到岸，咁成个地球嘅比例咪好劲？犀利呀！真系叫我大开眼界！夜晚喺船上面望星星特别多，再谂吓个宇宙，哗！一个地球都咁大，加埋其他星球，一个人嘅比例简直一粒尘都不如！当时系六几年，打紧越战，我跟东南亚船，去到越南，见到嗰度啲人生活得好悲惨，个个都系行尸走肉，街上冇一个人有笑容，我好唔明点解世界会变成咁，打仗为乜呢？以前我十五、六岁时走去学过打西洋拳，成日恃住自己识打，一畀人虾，我就会同人死过；但行船之后见到咁多嘢，乜都睇化晒，先发觉自己以前懒巴闭，争嚟做乜呢？
在新处境剧《爱．回家》中，丹爷（右三）饰演一个有仔有新抱有孙儿的爷爷。

不甘寂寞 行船行咗两年几，初初就好新鲜，但后尾成日都喺架船度，十几日净系望住个海，见唔到陆地，浮吓浮吓咁，我就开始觉得闷！如果我当时行嗰啲去美国成个月嘅大船，我谂我真系会跳海！哈哈哈！然后我见到有啲人做行船做到年纪好大，佢哋成世人都喺架船度，咁我自己又点呢？单身寡佬就话啫，但我总有一日要成家o架，唔通娶咗老婆之后，揼低个老婆去行船咩？无耐嗰水船返到嚟香港之后，国泰电影就租咗我哋架船拍戏，我做officer，要on duty，於是乎我就同啲导演、制片搞到好熟。咁跷嘅系，当时报纸话国泰演员训练班招募，我即刻返屋企喺柜底度，摷一张自己认为最有型嘅相寄去，哈哈哈！寄咗去之后，我行嗰几水船好彩都系去新加坡，好近，两次国泰寄信叫我去interview，好彩我都喺香港，到最后，我终於收到取录信，咁我就大镬啦！要受训半年，冇人工，我又冇得行船，即系要辞职啦！如果读唔成呢，我就要重新搵嘢做！卒之，我就拣咗辞职去受训，因为我其实一直都钟意啲表演嘅嘢，小学开始已经做话剧，而行船，始终并唔系我钟意嘅。
千禧年以原名刘庆基代表自由党参选立法会，儿子刘恺威和太太亦瞓身支持

随遇而安 半年嘅训练班毕业时，四十八个同学得番十一个，有啲畀公司飞，有啲读读吓觉得自己唔适合，走去转行。我系最后毕业同公司签约嗰十一个，但到依家，全班只系得番我一个仲做紧呢行，哈哈哈！同国泰签咗八年约无耐，大老板就撞机死咗，公司乱晒大龙，但邵氏嗰边就发展好好喎，我就谂：如果可以过邵氏就好喇！哼，跟住就有个我唔识嘅编剧打畀我，问我有冇兴趣过去邵氏倾倾，仲畀我好好条件，结果国泰当时嘅总经理Willie陈（陈自强）就帮我解咗约，我过咗邵氏之后九个月，国泰就话执笠。七○年去到邵氏，人工千几二千蚊，已经比出面好好，但做配音嘅，就可以搵到万几蚊一个月，我就谂：如果我识配音就好喇！跟住邵氏嘅配音领班知我识讲普通话，无啦啦打嚟问我想唔想学配音！哈哈哈！我啲际遇咁多年嚟都系人哋嚟搵我，唔系我自己去搵工，入佳视系咁，入无线、亚视都系咁，谂到嗰样就无啦啦会有，都算好彩罗！哈哈哈！
七八年由佳视跳槽到无线后，在《强人》中演「雷一帆」。
六八年初出道，在国泰电影拍国语片，当时的他还未有其招牌胡须。
七○年加入邵氏后，丹爷（右）曾在李翰祥执导的《大军阀》演出过。

另一个七十后的故事
丹爷说，在将播出的新处境剧《爱．回家》中，他的角色会升呢，「有仔有新抱，仲有埋孙添呀！」现实中，他有一子一女，是个非常open minded的父亲，现在专注於内地拍剧的大仔刘恺威，已有个要好的女友杨幂。问他可会恨饮这位未来新抱的茶，他哈哈哈笑起来：「未知呀、未知呀！啲后生仔嘅嘢，我都控制唔到o架！」有跟杨幂见过面吗？「有！佢系个好女仔，好乖女！先排佢有几部电影上画，嚟香港宣传好匆忙，但都有同我哋见面，印象都OKo架！就算冇时间见面，佢返到北京都会打畀我：『uncle，我回到北京啦！』好有交带，好少人会识得咁做！哈哈哈！」

跟儿子刘恺威感情要好，更大赞其女友杨幂是个好女仔。至於曾有说刘恺威整容，丹爷即火都嚟：「都黐线嘅！整乜鬼嘢容呀！不如话佢换咗个头呀！话阿威细个个鼻扁，我个仔由细个开始，都未扁过鼻！反而佢个样变得最紧要，系嗰阵喺横店拍「薛丁山」（《大唐女将樊梨花》），试造型时个导演话佢有baby fat，叫佢减，佢就日日喺横店跑步、做sit up，个几礼拜，就成块面凹晒，咪显得个鼻大咗啲罗！」
纵使曾经历过「太空人」生活，但刘丹一家四口却十分融洽！三十七岁属「七十后」的刘恺威，有个如此着紧自己的「四十后」父亲，的确很幸福

@威幂吧茶水妹 刚编辑了 怎么发表出去 有的还是乱呢 呵呵